У спрэчных момантах шукаць каштоўнасць адзінства

Навукова-практычная канферэнцыя “Князь Уладзімір. Цывілізацыйны выбар Старажытнай Русі” адбылася ў Пінску.

Пінскі каледж УА “Брэсцкі дзяржаўны ўніверсітэт імя А.С. Пушкіна” гасцінна запрасіў аддзел рэлігійнай адукацыі і катэхізацыі Пінскай Епархіі, каб студэнты, педагогі і духавенства сумесна абмеркавалі тэарэтычныя і злабадзённыя пытанні. З прывітаннем удзельнікам канфэрэнцыі выступілі высокапрэасвяшчэннейшы Сцяфан, архіепіскап Пінскі і Лунінецкі, і дырэктар каледжа Святлана Барчук.

На глыбіню і рознабаковасць дакладаў, высокі навуковы і практычны ўзровень прамоўцаў настройваў нават парадак дня прадстаўнічай сустрэчы. Выступленні не толькі ўзбагацілі новымі ведамі, але і прыцягнулі шчырасцю сапраўды захопленых сваёй справай – на духоўнай ці педагагічнай ніве – прафесіяналаў.

Аб спробах прыняцця хрысціянства на старажытнарускай зямлі да Х стагоддзя паведаміў магістрант Інстытута тэалогіі імя Свв. Кірылы і Мяфодзія БДУ Аляксей Дзямідаў (Мінск). Ролю князя Ўладзіміра ў станаўленні духоўнасці Старажытнай Русі прааналізаваў іерэй Іаан Гарбуноў, кандадыт багаслоўя, настаяцель Прыхода храма Св. Вялікапакутніцы Параскевы в. Альшаны (Столінскае благачыніе). На цікавае пытанне – што дало хрысціянства славянам у разуменні смерці – адказваў іерэй Віктар Сачкоўскі, кандыдат багаслоўя, кіраўнік аддзела рэлігійнай адукацыі і катэхізацыі Пінскай епархіі. Праз тэму “Вялікі князь Уладзімір – выхаванец роўнаапостальнай Вялікай княгіні Вольгі” аб уплыве бабуль на ўнукаў з шэрагам практычных прыкладаў расказаў іерэй Сергій Крышталь, доктар багаслоўя, настаяцель Прыхода храма іконы Божай Маці “Спатоленне пагіблых” г. Лунінца. Ад лунінчан у падарунак гаспадарам канфэрэнцыі перададзены кнігі “Памяць. Лунінецкі раён” і іншыя краязнаўчыя выданні.

Аб ролі князя Ўладзіміра ў станаўленні культуры Старажытнай Русі разважаў студэнт ІІІ курса каледжа Мікалай Лагодзіч. Набыякавую пазіцыю да надзённых праблем адлюстравалі пінскія настаўнікі. Магістр псіхалагічных навук, педагог-псіхолаг СШ №18 Ганна Свірыдэнка ацаніла ролю праваслаўных традыцый і каштоўнасцей у духоўна-маральным і патрыятычным выхаванні, а выкладчык гісторыі СШ №2 Людміла Даронькіна спынілася на сучасных аспектах цывілізацыйнага выбару князя Ўладзіміра і іх ролю ў выхаванні падрастаючага пакалення. Незвычайным поглядам на Свяшчэннае Пісанне ўразіў доктар сацыялагічных навук, прафесар Палескага дзяржаўнага ўніверсітэта Эдуард Смешак, які прадставіў Біблію як цэласны феномен фарміравання прафесійнай кампетэнтнасці студэнта.

Канферэнцыя працягнулася дыскусійным “круглым сталом”. Асэнсоўваючы, што цяпер славянскі свет вытрымлівае выпрабаванне на трываласць, свяшчэннікі і педагогі разам шукалі агульныя перавагі над спрэчнымі пытаннямі. Інтэлігенцыя духоўная і свецкая больш, чым іншыя прадстаўнікі грамадства, усведамляе: каб выжыць у XXI стагоддзі, усходнім славянам трэба захаваць цывілізацыйнае адзінства.

Таццяна КАНАПАЦКАЯ. Фота аўтара.