У
інфармацыйна-асветным цэнтры храма
іконы Божай Маці “Спатоленне пагіблых”
(“Взыскание погибших”) адбылася праграма
“Дзень Анёла” ў гонар імяніннікаў
снежня.
Па
агульнаму меркаванню, вялікапакутніца
Варвара і цудатворац Мікалай так шчыра
шануюцца ў народзе, што жыцці гэтых
святых дастаткова вядомы кожнаму з
дзяцінства. Вырашылі прыгадаць пра
звычайных людзей з гэтымі імёнамі, якія
годна пражылі свой век і пакінулі
дабратворны след у душах навакольных.
Іерэй
Сергій Крышталь расказаў аб адной з
прыхаджанак. Яна насіла імя Варвара,
рэгулярна наведвала царкву. Калі здароўе
стала падводзіць, а ўзрост – нагадваць
аб завяршэнні зямнога шляху, сталыя
дзеці сталі прапаноўваць запрасіць на
дом свяшчэнніка для споведзі і прычасці.
“Яшчэ не час”, – гаварыла бабуля, якой,
тым не менш, ішоў 102-го год. Нарэшце
напярэдадні дня святой Варвары родныя
старажылкі патэлефанавалі айцу Сергію.
Бацюшка выканаў таінствы. Хутка жанчына
спакойна адышла да Госпада у дзень
прычасця на свята вялікапакутніцы
Варвары.
–Звярніце
ўвагу, – падкрэсліў свяшчэннік, – на
іконах святая Варвара адлюстроўваецца
з чашай. Менавіта да вялікапакутніцы
звяртаюцца вернікі з малітвамі, каб не
памерці без споведзі і прычасці...
70-гадовая
лунінчанка Ганна Аляксандраўна Аляшкевіч
падзялілася цёплымі ўспамінамі:
–Маёй
бабулі Варвары Бог падарыў 95 год жыцця,
хаця і са шматлікімі выпрабаваннямі.
Дзед выехаў на заробкі ў Амерыку, яна
сама гадавала пяцёра дзяцей. У час вайны
старэйшы сын змагаўся на фронце. Вярнуўся
ў 1945-ым, але ад цяжкага ранення хутка
памёр. Праз год пайшла з жыцця мая мама,
пакінуўшы дзвюх малышак. Бацька па
палітычных матывах быў арыштаваны і
сядзеў у турме. Бабуля не дазволіла
ўнучкам стаць сіротамі. У яе мы гадаваліся,
ад яе ў школу пайшлі. Спачатку з палатнянай
торбай, а потым дзесьці знайшла для мяне
чырвоны “рэдзікюль”. Колькі было
радасці і гонару! Бабуля была адданай
верніцай, дома заўсёды чытала Біблію,
а пра яе дабрыню з пакалення ў пакаленне
звесткі перадаюцца…
Калі
размова зайшла пра свяціцеля Мікалая,
архіепіскапа Мір Лікійскіх, перш-наперш
прыгадалі, што цудатворац стаў правобразам
Санта-Клауса ў заходніх краінах, а ў
нашай – Дзеда Мароза. Вядомы шматлікія
добрыя справы, якімі дапамагаў святы ў
самых безнадзейных сітуацыях, што
адпавядае нашаму чаканню цуда ў калядныя
і навагоднія дні.
Аказалася,
што ў сям’і айца Сергія два блізкія
чалавекі маюць імя Мікалай. Гэта бацька,
аб якім знаёмыя пінчане адгукаюцца як
пра чалавека з глыбокімі ведамі і
філасофскім складам розуму. З такім жа
імем быў і дзядзька, брат мамы, але, на
жаль, памёр 19-гадовым, дарэчы, у дзень
Вясновага Міколы 22 мая, на які ў той год
прыпала і Ўвазнесенне Гасподняе. Па
ўспамінах родных, вельмі захапляўся
чытаннем, што было рэдкасцю ў палескай
вёсцы…
Сёстры
Людміла і Ірына Ванюк прыгадалі брата
Мікалая, які ў Лунінцы таксама быў
заўзятым бібліяфілам. Сваю любоў да
кніг захаваў і ў Падмаскоўі, дзе займаўся
прадпрымальніцкай дзейнасцю. Яму было
толькі 55 год, калі спынілася сэрца.
95-гадовая мама цяпер жыве быццам за сябе
і за сына…
Любоў
Дзмітрук расказала пра свайго бацьку.
Мікалай Якубовіч быў удзельнікам Вялікай
Айчыннай вайны. Пасля вяртання з фронту
працаваў памочнікам машыніста паравознага
дэпо. Гадаваць дзевяць дзяцей дапамагала
прысядзібная гаспадарка – жылі ж на
хутары Любажэрдзе. Усе дзеці выраслі
годнымі людзьмі, набылі адукацыю,
асталяваліся ў Лунінцы. Шкадуюць, што
не захавалі старую ікону свяціцеля
Мікалая, якая знікла, калі злачынцы
разрабавалі бацькоўскі дом…
Жыццёвыя
гісторыі, што гучалі ў драўляным
памяшканні часовага будынка храма,
нагадвалі традыцыйныя вячоркі, на якія
спрадвеку доўгімі зімовымі вечарамі
збіраліся жыхары нашых мясцін. І хаця
за акном ішоў дождж, святлом любові да
родных і ўдзячнасцю Богу за сённяшні
дзень былі прасякнуты пачуцці ўдзельнікаў
сустрэчы, якія на завяршэнне ажыццявілі
кінападарожжа ў “Літургію” па блізкай
і святой для беларусаў зямлі праваслаўнай
Сербіі…
Таццяна
КАНАПАЦКАЯ. Фота аўтара.
Комментарии
Отправить комментарий