Вядома,
што імя Наталля перакладаецца з лацінскай
мовы як “родная”, а сваю святую імянінніцы
ўшаноўваць 8 верасня.
Напярэдадні
ў інфармацыйна-асветным цэнтры храма
іконы “Спатоленне пагіблых” (“Взыскание
погибших”) адбылася сустрэча ў праекце
“Дзень Анёла”. Прысутныя расказвалі
аб тым, чаму атрымалі сваё імя. Адначасова
светла прыгадваліся многія людзі, якія
пакінулі свой значны след не толькі ў
лёсах імянінніц. Былы і цяперашні
дырэктары краязнаўчага музея першай
назвалі незабыўную спявачку Наталлю
Мурко, якая застаецца ўзорам таленту і
дабрыні для сваіх цёзак. Старшыня
раённага савета ветэранаў педагагічнай
працы Наталля Казанкова пазнаёміла з
публікацыямі “ЛН”, якія занатавалі
лунінецкую “зорку”. Аб сабе ж паведаміла,
што імя ёй выбрала старэйшая сястра. У
СШ №2 у 1950-ыя, у час яе вучобы, было толькі
дзве дзяўчынкі з такім імем, а ў СШ №4,
у 1980-ыя, калі Наталля Іванаўна настаўнічала,
у яе класе было дзевяць цёзак, што
дазволіла нават стварыць “Хор Наташак”.
Кіраўнік раёнага сховішча даўніны
Наталля Благадзёрава за выбар імя
ўдзячна маме і рада, што, дзякуючы гэтаму,
далучана да папярэдніх пакаленняў, –
а гэта імя ў нашым краі часта сустракаецца
нават у ХVIII
стагоддзі.
Ветэран
працы Ніна Кузьмінічна (на жаль, адмовілася
сфатаграфавацца разам) расказала, што
Наталляй яе дачку назвала свякроў у
гонар сваёй маці. Нявестцы гэта не
падабалася, але яна была выхавана ў
паслухмянасці і згадзілася. Усмешку
выклікалі наступныя словы жанчыны:
–Вельмі
люблю сваю Наташу, але характар дачушкі
– выліты, як у свекрыві…
Намеснік
дырэктара СШ №2 Наталля Бойка прыгадала,
што магла б і не насіць гэта імя. Мама
прасіла назваць так першую дачушку, а
бацька ў сельсавеце запісаў “Алена”.
Пры нараджэнні другой парадзіха зноў
настойвала на любімым імя, а яе спадарожнік
жыцця запісаў “Святлана”. Трэцюю дачку
мама не дазволіла рэгістраваць бацьку,
а зрабіла гэта сама, як толькі была ў
стане наведаць сельсавет.
8-класніца
гімназіі Наталля Камандзіс перадала
ўспаміны мамы. Акушэрка, якая прымала
нованароджаную, стоячы побач з урачом
Наталляй Шумскай, усклікнула:
–Вось
яшчэ адна Наташка будзе!
Парадзіха
вырашыла пакінуць для дачкі першым
прагучаўшае імя. Дзяўчынка гаворыць,
што яно ёй вельмі падабаецца. У СШ №2,
дзе раней вучылася, была адной Наталляй
у класе, цяпер жа ў яе паявілася цёзка.
Спецыяліст
па тэлекамунікацыям Васіль Бажко з
жартам паведаміў, што вельмі хацеў
запісаць дачку Наташай, а ў сельсавеце
не згадзіліся і зарэгістравалі афіцыйным
імем. Работніца прыватнай фірмы Тамара
Нарэнка адзначыла, што мама яе – Наталля
Андрэеўна. Пазнаёміўшыся з жыццём
святых, яна мяркуе, што дзядуля мог быць
хрышчаны Адрыянам, але ў пасляваенны
час гэта імя часта запісвалі як Андрэй.
Настаўніца СШ №2 Дзіяна Сладзінская
адзначыла, што імя Наталля – у многіх
яе сябровак, якія яна лічыць носьбітамі
чуласці і мэтанакіраванасці.
Сустрэча
адбывалася ў Дзень беларускага
пісьменства. Удзельнікі чыталі вершы
з кнігі “Акно для матылькоў” Міхася
Скоблы – паэт піша і пра вечныя
каштоўнасці, што захоўваюць храмы.
Прыцягнуў вагу відэафільм аб стваральніках
славянскай пісьменнасці роўнаапостальных
Кірыле і Мефодыі. Затым у храме настаяцель
іерэй Сергій Крышталь служыў акафіст
святым Наталіі і Адрыяну – яны засталіся
вернымі Богу і сямейнаму абавязку нават
цаной сваіх жыццяў…
Таццяна
КАНАПАЦКАЯ. Фота аўтара.
Комментарии
Отправить комментарий