Лістапад і ружы на архіерэйскім падвор’і

Як вярнуцца да сямейных каштоўнасцей? Гэтым пытаннем былі прасякнуты многія выступленні ўдзельнікаў Свята-Макарыеўскіх адукацыйных чытанняў.

 “Традыцыя і навацыі: культура, грамадства, асоба” – такой была тэма сустрэчы ў Пінскай гарадской бібліятэцы. Восем благачыній прадстаўлялі свяшчэннікі і клір, у тым ліку настаяцель храма іконы Божай Маці “Спатоленне пагіблых” (“Взыскание погибших”) іерэй Сергій Крышталь і бібліятэкар Любоў Дзмітрук, а таксама педагогі аддзелаў адукацыі, спорту і турызму адпаведных райвыканкамаў.

Удзельнікаў чытанняў вітаў архіепіскап Пінскі і Лунінецкі Сцяфан, кіраўнікі шэрагу службаў Пінскага гарвыканкама. Адкрыў сустрэчу сакратар сінадальнага аддзела рэлігійнай адукацыі і катэхізацыі, настаяцель прыхода храма прав. Іаана Крандштадскага г. Мінска іерэй Алексій Хацееў. Даклад аб пачатку праваслаўя на беларускіх землях ён завяршыў думкай вядомых навукоўцаў: хрысціянства прынесла маральныя адносіны да рэчаіснасці. Кандыдат геаграфічных навук, дацэнт Інстытута турызму БДУ ФК Віктар Калесніковіч, прысвяціўшы выступленне прав. Ефрасініі, ігуменіі Полацкай, адзначыў унікальнасць першай асветніцы Русі, роўнай якой у той час не ведала Еўропа. На актуальнасці духоўна-маральнага выхавання моладзі на сучасным этапе спынілася кандыдат педагагічных навук, дацэнт БрДУ імя А.С. Пушкіна Любоў Макарава. Аб супрацоўніцтве свяшчэннікаў з Баранавіцкім дзяржаўным універсітэтам паведаміў настаяцель храма блв. князя Аляксандра Неўскага протаіерэй Віталій Лазоўскі. Царкоўным поглядам на асэнсаванне навацыйных працэсаў у культуры і навуцы падзяліўся кандыдат багаслоўя і філасофскіх навук, прарэктар Інстытута тэалогіі БДУ, дацэнт Мінскай духоўнай акадэміі протаіерэй Сергій Маўсесян.

Надзвычай зацікавілі выступленні практыкаў. Удзельнікі чытанняў асабліва віталі думку галоўнага спецыяліста аддзела адукацыі, спорту і турызму лунінчанкі Таццяну Трэгубавай, якая ў дакладзе “Нам не дано предугадать, чем наше слово отзовется” нагадала аб місіянерскай ролі настаўніка. Аб сутнасці і праблемах духоўна-маральнага выхавання вучняў у сучаснай школе разважаў кандыдат педагагічных навук дырэктар СШ №12 г. Пінска Леанід Ярашэвіч. На яго думку, некаторыя законы, якія прыняты дзяржавай па заходніх узорах, супярэчаць нашым традыцыйным сямейным каштоўнасцям. Цытаванне Леанідам Аляксандравічам пазіцый святых айцоў, што “біццё – на карысць, калі цэлыя косці”, выклікала апладысменты падтрымкі і свяшчэннікаў, і педагогаў. Уражваючымі выпадкамі з рэальнага жыцця канкрэтызаваў сучасны погляд на ўзаемадзеянне медыцыны і Праваслаўнай Царквы кандыдат медыцынскіх навук, галоўны ўрач Пінскай дзіцячай бальніцы хірург Мікалай Целяціцкі.

Пленарнае пасяджэнне працягнулася не менш захапляючай работай у секцыях. Настаўнікі дзяліліся распаўсюджаннем педагагічнага вопыту духоўна-маральнага выхавання школьнікаў. Узаемадзенне Праваслаўнай Царквы з дзяржаўнымі органамі і арганізацыямі ў сферы сацыяльнага служэння абмяркоўвалі памочнікі благачынных па гэтых пытаннях. Да духоўнага адраджэння грамадства праз праваслаўную кнігу заклікалі свецкія і царкоўныя бібліятэкары. Чацвёртая секцыя – “Царква і мэдыа” – сабрала журналістаў, якія пішуць на духоўную тэму, і прадстаўнікоў прэс-службаў прыходаў. Ажыўлены абмен думкамі адбываўся ў памяшканні нядзельнай школы храма Уваскрэсення Славушчага – архіерэйскага сабора.

Адрашыўшыся ад будзённай мітусні, уражаныя высокімі духоўнымі імкненнямі сучаснікаў раптам звярнулі ўвагу, што на кветніках каля храма не здаюцца надыходзячай зіме прыгожыя буйныя ружы…

Таццяна КАНАПАЦКАЯ. Фота аўтара.