Пераможныя песні вясны

гучалі на IV адкрытым велікодным фестывалі “Лікуй, душа!”, які праведзены ў Лунінецкім благачыніі з удзелам Уладыкі Сцяфана.

Ушанавалі 450-годдзе праведнай дзевы Іўліаніі, княжны Альшанскай, якая другой (пасля Ефрасінні Полацкай) з жанчын праваслаўнай Русі была ўдастоена гонару ўпакоіцца ў Кіева-Пячэрскай лаўры. Аб жыцці святой усхвалявана паведаміў 9-класнік Мікалай Альцывановіч. 9-класніца Вераніка Макаловіч нагадала аб 110-годдзі пачатку творчасці Якуба Коласа (дарэчы, у трылогіі “На ростанях” будучы пясняр увекавечыў сям’ю свяшчэнніка, які ў пачатку ХХ века пабудаваў у Лунінцы храм, стаўшы ўпрыгожаннем горада). Гэтыя і іншыя лунінецкія гімназісты разам з настаўніцай Ірынай Грушэўскай добраахвотна дапамагалі арганізацыі масавага відовішча. Вядучымі былі бібліятэкар гімназіі Ірына Раманчук і настаўніца СШ №4 Святлана Карпінская. Актыўны ўдзел прынялі культработнікі, якія забяспечылі музычнае суправаджэнне фестывалю, арганізавалі выставы кніг з аддзела адказнага захоўвання цэнтральнай бібліятэкі і старажытных ікон з фондаў краязнаўчага музея.

Канцэрт доўжыўся амаль 4 гадзіны, але адбыўся быццам на адным дыханні. Больш як 150 дарослых і 110 дзяцей славілі Вялікдзень, Уваскрэсенне Хрыста, Вялікую Перамогу. Праграму стварылі 20 царкоўных хораў 11-ці прыходаў, ансамблі “Крынічанька” ГДК і “Вытокі” тэрытарыяльнага цэнтра сацыяльнага абслугоўвання. Пастаянны ўдзельнік свята спеваў – Лунінецкая дзіцячая школа мастацтваў. Удала дэбютавала 6-класніца СШ №1 г. Лунінца Дар’я Сыцэвіч.

Аб’яднаныя любоўю, на сцэне Лунінецкага ГДК выступалі людзі розных узростаў. Рэгент Свята-Параскевінскага храма в. Бастынь Мікалай Кезь хутка адзначыць 80-годдзе, а харыстцы Спаса-Прэабражэнскага храма в. Язвінкі Ані Коваль – толькі 8. Сёлета завяршыўся зямны шлях Дар’і Луцук, якая амаль 80 год спявала ў храме Нараджэння Багародзіцы в. Лахва. Месца прабабулі на клірасе занялі 9-гадовая Каця і 13-гадовая Даша, якія саліравалі ў дзіцячым калектыве (рэгент Валянціна Скрабец). Зладжанасцю гучання ўразілі 35 юных харыстаў храма Нараджэння Іаана Прадцечы г. Мікашэвічы (рэгент Яўгенія Ткачук).

Пеўчыя храма святых Веры, Надзеі, Любові і Сафіі в. Багданаўка духоўны рэпертуар разнастаілі фальклорам і інсцэніроўкай. Праваслаўная моладзь далучылася да больш вопытных спевакоў храмаў Спаса-Прэабражэнскага в. Дзятлавічы, Свята-Пакроўскага в. Вялікія Чучавічы, Новамучанікаў і Спаведнікаў Беларускіх в. Красная Воля. Асаблівую прыхільнасць гледачоў выклікалі спевы харыстаў Свята-Нікольскага храма в. Кажан-Гарадок (рэгент Ірына Веляскевіч), двух калектываў – “Мірніца” і “Любімічы” – храма іконы Божай Маці “Спатоленне пагіблых” г. Лунінца (адпаведна Таццяна Круглік і Алена Кавалевіч), ансамбля духоўных спеваў “Логас” (Вольга Белавус), дзіцячай і дарослай вакальных груп Крыжа-Узвіжанскага храма г. Лунінца. Рэгент Таццяна Мартынава зачаравала дзіўным голасам не толькі ў царкоўных спевах, але і як салістка народнага аркестра народных інструментаў (мастацкі кіраўнік Наталля Юрцэвіч). Калі таленавітая спявачка выконвала песню Пятрова “На кургане”, немагчыма было ўстрымацца ад слёз... Велікоднае пераможнае лікаванне душы ўвасобілася ў ігры на балалайцы Мікалая Кавалевіча, які з аркестрам выканаў канцэртныя варыяцыі Гарадоўскай на тэму рускай народнай песні “Калінка”.

Архіепіскап Пінскі і Лунінецкі Сцяфан уручыў дыпломы кіраўнікам калектываў і салістам. Уладыка прыгадаў, што ў 1950-ыя на адным з грамадскіх сходаў з удзелам духавенства нейкі партыйны кіраўнік зняважыў іх вызначэннем “Русь адыходзячая”. У адказ адзін са свяшчэннікаў сказаў: “Мы яшчэ вернемся…”. На думку Ўладыкі, фестываль яскрава паказаў зацвярджэнне духоўнага пачатку ў сучасным грамадстве. На вокліч “Хрыстос Уваскрэс!” удзячная публіка сотнямі галасоў – але “едиными усты и единым серцем” – адказала: “Сапраўды Уваскрэс!”.

Таццяна КАНАПАЦКАЯ. Фота аўтара.