Прароцкае прадвесце

з жыцця святога Іаана Рыжскага прыгадала ІІІ музычна-літаратурная праграма “Пакроўскі кімвал” у інфармацыйна-асветным цэнтры храма іконы Божай Маці “Спатоленне пагіблых” (“Взыскание погибших”).

“Пакроўскі Іван”. Так у нашым краі называюць 9 кастрычніка – дзень апостала Іаана Багаслова. З сумам прыгадалі трагедыю 73-гадовай даўніны – знішчэнне фашыстамі Дзятлавіцкіх хутароў… Бібліятэкар гімназіі Ірына Пятроўна Раманчук прапанавала паселішча, пацярпеўшае ад вайны, уключыць у акцыю міласэрнасці “Марш Жыцця”, што пракладзены ўжо да Лугоў і Мелясніцы. Ва ўспамінах аб трагедыі апошняй вёскі 10-класніцу Вольгу Заляшчук асабліва ўразіла гібель 20-гадовай Любы Канапацкай, якая тройчы вырывалася з полымя, а ворагі зноў і зноў кідалі дзяўчыну ў агонь…

Прароцкае прадвесце вайны адлюстравана ў жыцці свяшчэннамучаніка Іаана, архіепіскапа Рыжскага. У 1934-ым нелюдзі забілі архіерэя і, каб захаваць сляды злачынства, падпалілі яго келлю. Але памяць аб адданым служэнні Богу сапраўды вечная. Аб гэтым сведчыць і праслаўленне святога, на часцінцы мошчаў якога асвячаны наш храм, і прысвечаная яму штогадовая сустрэча.

Духоўную праграму падрыхтавалі вучні і педагогі гімназіі, правяла настаўніца Ірына Аляксандраўна Грушэўская. Прыгадалі аб пабрацімскіх сувязях Лунінца з Латвіяй. Гэта краіна дарагая сэрцу Наталіі Іванаўны Казанковай – у Рызе пражывае сям’я яе дачкі. У выкананні ветэрана педагагічнай працы прагучаў верш “Да Божай Маці” Міхаіла Лермантава. Паэт, які нарадзіўся ў сярэдзіне кастрычніка, кранае душы просьбай не за сябе – за цудоўную дзяўчыну… У свята Пакрова Багародзіцы адзначаецца і дзень прападобнага Рамана Сладкапеўца – тысячы песнапенняў, якія напісаў дыякан з Бейрута, вось ужо 450 год выконваюць клірасныя хоры. Аб жыцці святога паведаміла 10-класніца Святлана Калесніковіч. “Пакроўскі кімвал” змясціў таксама некалькі тэматычных відэасюжэтаў.

Настаяцель храма іерэй Сергій Крышталь на прыкладах святых паказаў простыя ісціны. Што тым, каму шмат дадзена, з тых шмат і патрабуецца… Што ганарлівым Бог працівіцца, а смірэнным – спрыяе… Што, калі людзі просяць і малітва ажыццяўляецца, то яны павінны вярнуць Богу любоў, з якой той выканаў іх просьбу…

Малітоўным завяршэннем праграмы стаў нядзельны акафіст у храме.

Таццяна КАНАПАЦКАЯ. Фота аўтара.