Імя носьбіта перамогі

У гонар вялікамучаніка Георгія Пераможаносцы ў царкоўным календары ўстаноўлены 4 святы, у тым ліку – 9 снежня.

Напярэдадні ў інфармацыйна-асветным цэнтры іконы Божай Маці “Спатоленне пагіблых” (“Взыскание погибших”) адбылася традыцыйная праграма “Дзень Анёла”. Імя “Георгій” з грэчаскай мовы перакладаецца як “земляроб”. Настаяцель іерэй Сергій Крышталь прыгадаў свяшчэнніка, які яго хрысціў. Протаіерэй Георгій Скабей прыцягнуў хлопчыка да духоўнасці і ўласным прыкладам – яго сын і трое ўнукаў таксама выбралі пастырскі шлях... Актыўнымі ўдзельнікамі сустрэчы былі ветэраны педагагічнай працы. Аляксандра Кулага і Ірына Барысава расказалі пра бацькоў, якія працавалі на чыгунцы. Наталля Казанкова прысвяціла выступленне свайму вядомаму дзядзьку. Георгій Сцяпанавіч Ішчанка – першы камсамолец Лунінца, у пасляваенны час быў выкладчыкам чарчэння і малявання ў гарадскіх школах. Яго цудоўныя карціны захаваліся толькі ў нашчадкаў – арганізацыя выставы пазнаёміла б сучаснікаў з мастацтвам педагога… Узорам энцыклапедычных ведаў, высакароднасці і інтэлігентнасці застаўся выкладчык хіміі Георгій Антонавіч Касцючэнка, якога настаўнікам у прафесіі лічаць многія сённяшнія выдатныя педагогі… Такая ж знакавая для Лунінца асоба – Георгій Аляксандравіч Вайндрах. Гісторык і краязнаўца, пасля ён выкладаў у Брэсцкім педагагічным інстытуце, стаў кандадытам гістарычных навук і занатаваў для Беларусі многія старонкі рэвалюцыйнага мінулага Лунінеччыны…

З асаблівай цікавасцю расповяды аб легендах адукацыі нашага краю слухалі госці – настаўнікі СШ №1 г. Лунінца. Прадстаўнікі старэйшай школы раёна маюць падставы ганарыцца сапраўднымі зоркамі і сярод калег папярэдніх пакаленняў, і сярод выпускнікоў. У іх ліку – генерал-маёр Георгій Уладзіміравіч Вярэніч. Ён прайшоў “гарачыя кропкі” канца 1980-ых – пачатку 1990-ых, быў намеснікам камандуючага Маскоўскай акругі войскаў МУС, адзначаны шэрагам узнагарод і баявых, і царкоўных. Ікона ў новым храме Лунінца нагадвае аб сямейным ахвяраванні земляка сваёй малой радзіме...

Сустрэча нагадала аб многіх выдатных дзеячах з імем шануемага ў праваслаўі Нябеснага Заступніка першапрастольнай. Праграму завяршылі вальс і раманс Георгія Свірыдава да пушкінскай “Завірухі”. Бессмяротная музыка сведчыла і аб вечным жыцці людзей, якія аддана служылі справай грамадству.

Таццяна КАНАПАЦКАЯ. Фота аўтара.