“Аднадумцаў паслухалі – І СЯБЕ ПАКАЗАЛІ”
У 4-ы раз у Пінску
адбыліся епархіяльныя праваслаўна-краязнаўчыя чытанні “Да вытокаў сваіх
вяртаемся”.
Упершыню ў рэгіянальнай сустрэчы ўдзельнічалі нашы
бібліятэкары – Ніна Дамашэвіч (сельгаскаледж, Лунінец) і Лілія Віўдэнка (СШ №1
г. Мікашэвічы). У Год малой радзімы кожны з дакладчыкаў – свяшчэннікі, настаўнікі,
культработнікі – імкнуўся захапіць адметнасцямі мясціны, дзе нарадзіўся. Ніна Мікалаеўна і Лілія
Даміраўна адлюстравалі ўласныя намаганні ў напрамку духоўна-патрыятычнага
выхавання. З захапленнем расказвалі, як шмат даведаліся аб гістарычных падзеях
суседніх раёнаў і нават украінскага памежжа. 25 год святкуе адроджаны Свята-Варварынскі
жаночы манастыр… Да 120-годдзя рыхтуецца Свята-Троіцкі храм в. Месткавічы… Свае
летапісы ствараюць Свята-Увазнясенскі храм в. Ставок (гэтыя тры святыні
належаць да Пінскага благачынія) і Свята-Успенскі храм в. Быцень (Івацэвіцкае
благачыніе)… Ганаровы госць з Украіны протаіерэй Павел Дубянец нагадаў аб
500-годдзі старэйшага на Палессі Нобельскага Евангелля, што адзначым у 2020-ым…
Навуковую падставу мелі даклады кандыдата культуралогіі БрДУ імя А.С. Пушкіна
аб узаемадзеянні праваслаўнага духавенства і рускай грамадскасці Брэста ў
міжваенны перыяд і галоўнага бібліятэкара Нацыянальнай бібліятэкі Беларусі аб
рабоце кніжных скарбніц як сродка духоўна-маральнага і патрыятычнага выхавання
падрастаючага пакалення.
“Пяцігодка” праваслаўнага чытальніцкага клуба
“Благавест”, які створаны пры Пінскай бібліятэцы, адзначана шэрагам паломніцкіх
паездак. Падвядзенне вынікаў работы называлася “Нам
разам цікава”. Гэтымі ж словамі характарызавалі епархіяльныя чытанні
прадстаўніцы нашага раёна. Іх уражанні занатавала праграма Пінскага кабельнага
тэлебачання. І хаця нашых зямлячак прыспешваў расклад руху па чыгунцы, добрыя
справы заўсёды бласлаўляюцца, а значыць – на свой цягнік Ніна Мікалаеўна і Лілія
Даміраўна паспелі. На зваротным шляху калегі ажыўлена абмяркоўвалі, якой
наступнай старонкай мінулага нашага краю прыцягнуць увагу пінчукоў.
Таццяна КАНАПАЦКАЯ.
Комментарии
Отправить комментарий