“Дзякуючы пагранічным войскам я нарадзілася…”

Першы сказ адразу прыцягнуў увагу да прамоўцы.

У інфармацыйна-асветніцкім цэнтры храма іконы Божай Маці “Взыскание погибших” настаўніца СШ №2 г. Лунінца Дзіяна Сладзінская расказвала пра сваю сям’ю. Яе бацька служыў у Грузіі, закахаўся ў мясцовую дзяўчыну і прывёз яе ў Беларусь. З дзяцінства дачка чула ўспаміны аб службе на заставе, аб помніку пагранічніку з сабакам, каля якога закаханыя прызначалі спатканні. Летась, больш чым праз 55 год пасля тых лёсавызначальных падзей, Дзіяна Раманаўна наведала Грузію і дзялілася ўражаннямі. Адначасова педагог шкадавала, што з сучасных падручнікаў гісторыі зніклі факты аб пагранічніках, і абуралася асобнымі шоумэнамі, якія зневажаюць імёны легендарных асоб…
Удзельнікамі чарговай сустрэчы духоўна-патрыятычнага праекта былі вучні лунінецкіх СШ №1, СШ №2 і сельгаскаледжа. Нагадалі аб прэпадобным Нестары Летапісцы, памяць якога шануецца ў лістападзе, і прэпадобным Іліі Мурамскім, якога лічаць правобразам першага рускага пагранічніка. Настаяцель протаіерэй Сергій Крышталь расказаў аб наведваннях Кіева-Пячэрскай лаўры, дзе знаходзяцца мошчы гэтых святых.
Дакументальны фільм пазнаёміў з буднямі Пінскага пагранічнага атрада. Удзельнікамі ўрачыстасці ў гонар яго 25-годдзя былі старшыня Лунінецкай “пярвічкі” Пінскай гарадской арганізацыі ГА “Беларускі саюз ветэранаў органаў пагранічнай службы” Сяргей Сойка і сакратар Віталій Драніч, якія на традыцыйнай суботняй сустрэчы са школьнікамі падзяліліся ўспамінамі аб службе. Завяршыла праграму музычная прэзентацыя аб Архістрацігу Міхаілу, які лічыцца нябесным ахоўнікам пагранічнікаў.
Таццяна КАНАПАЦКАЯ. Фота аўтара.