ПАДЗЕІ
«Божы дух вітаў у высі…»
На сустрэчы ў Пінскім
епархіяльным упраўленні дамовіліся аб працягу духоўна-літаратурных стасункаў з
Домам Коласа ў Мінску.
Як вядома, пачатак ім паклаў светлай памяці
Уладыка Сцяфан (Корзун, 25.03.1944-22.04.2022)... Звычайна адзін з
Калядных дзён вызначаўся асаблівай урачыстасцю, калі Дзяржаўны
літаратурна-мемарыяльны дом-музей Якуба Коласа наведваў архіерэй з Палесся, каб
павіншаваць сямейнікаў К.М. Міцкевіча святочнымі падарункамі. Галоўным з іх
станавіліся духоўныя песнапенні, часцей за ўсё – у выкананні хора «Усіхсвяцкі»
пад кіраўніцтвам рэгента Дзмітрыя Такмакова.
Сёлета ў Калядныя дні паміналі мітрапаліта, Ганаровага
Экзарха ўсея Беларусі Філарэта (Вахрамеева, 21.03.1935-12.01.2021) з нагоды
гадавіны яго прастаўлення. Але сумная падзея не стала перашкодай для захавання
традыцыі – проста змянілася дата наведвання Уладыкам Сцяфанам Дома Коласа. Гэта
быў першы тыдзень вясны – масленічны, як кажуць у народзе. І зноў гучалі
духоўныя, народныя, папулярныя песні, за што гледачы шчыра дзякавалі
апладысментамі. Літаратурную старонку прадставіла ўнучка народнага песняра
Марыя Міхайлаўна Міцкевіч. Яна падарыла шаноўнаму госцю выданне Евангелля ў
перакладе на беларускую мову, што зрабіў малодшы брат Якуба Коласа – Міхась
Міцкевіч (гэтым жа імем быў названы і яе бацька).
У складзе дэлегацыі з Палесся былі і лунінчане.
Дырэктару музея Ірыне Уладзіміраўне Мацяс уручаны фотаальбом «Учитель, перед
именем твоим позволь смиренно преклонить колени…», прысвечаны 55-годдзю СШ №3
г. Лунінца. Тут змешчаны нарыс па гісторыі адукацыі горада з фотаздымкам
Канстанціна Міхайлавіча Міцкевіча (03.11.1882-13.08.1956), які 110 год таму быў
«рэпетытарам» вучняў Лунінецкага народнага пачатковага вучылішча.
Сёлета працягваюцца юбілейныя мерапрыемствы ў гонар
140-годдзя Якуба Коласа. На міжрэгіянальную канферэнцыю «Палескі след класіка»
ў Пінск 18 лістапада была запрошана Вера Данілаўна Міцкевіч, унучка Якуба
Коласа. Яна лічыць гэты горад родным – тут вянчаліся яе дзед з бабуляй, аб чым
сведчыць мемарыяльная дошка на браме Свята-Варварынскага храма, тут нарадзіўся
бацька – старэйшы сын Міцкевічаў.
Галоўнай падзеяй лістападаўскага наведвання сталіцы
Палесся для ўнучкі класіка нацыянальнай літаратуры стала знаёмства з Уладыкам Георгіем
(Вайтовічам), які сёлета 2 чэрвеня хіратанісаны ва епіскапа Пінскага і Лунінецкага.
Архіерэй выказаў намер працягваць духоўна-культурнае супрацоўніцтва з Домам
Коласа. Уладыка Георгій асабліва падкрэсліў, што ў цяперашні «смутны час»
прыклад жыцця народнага песняра яскрава сведчыць аб вечнасці маральных
каштоўнасцей роду і нацыі. Нездарма літаратуразнаўцы лічаць «падручнікам па
сямейным выхаванні» кнігу «Табою жыў. Табой жыву…» (навінку РВУ «Выдавецкі дом
«Звязда»), прысвечаную жонцы Якуба Коласа. Марыя Дзмітрыеўна Каменская працавала
настаўніцай у Пінску, родным горадзе архіерэя, і тут сустрэла свой лёс...
Міжволі прыгадалася, што мужа і жонку Міцкевічаў, падобна святым ахоўнікам
сям'і, называюць «палескімі Пятром і Фяўроніяй».
Першым гэту думку выказаў Уладыка Сцяфан, які глядзеў
на нас з вялікага патрэта ў кабінеце свайго пераемніка па духоўнай пасадзе,
быццам благаслаўляючы на далейшыя стваральныя справы ў імя шанавання народнага
песняра, дзеля Палесся і Беларусі…
Таццяна Канапацкая.
На здымку з Уладыкам Георгіем і Верай Данілаўнай
Міцкевіч (злева направа) – клірык
храма Уваскрэсення Славушчага г. Пінска іерэй Мікіта Пшанічны, настаяцель
Свята-Параскевінскага храма в. Бастынь Лунінецкага благачынія протаіерэй Іаан
Пятрэнка, які з сям'ёй неаднаразова наведваў Дом Коласа, супрацоўнік
Дзяржаўнага літаратурна-мемарыяльнага дома-музея Якуба Коласа Іван
Сільвестравіч Дубовік.
Фота аўтара.
Комментарии
Отправить комментарий