ПАДЗЕЯ
Каляды ў Доме Коласа – з
малітвай, спевамі, вершамі…
Епіскап Пінскі і Лунінецкі Георгій упершыню
наведаў Дзяржаўны літаратурна-мемарыяльны музей народнага песняра ў Мінску.
Любоў
да нацыянальнай спадчыны ў светлай памяці Уладыкі Сцяфана
(25.03.1944-22.04.2022) ажыццяўлялася праз сапраўднае “місіянерства роднай
мовы”. У ліку шматлікіх спраў пінскага архіерэя было і штогадовае каляднае віншаванне
сваякоў класіка беларускай літаратуры і супрацоўнікаў “храма муз”.
–Вельмі
хочацца захаваць і падтрымаць традыцыю, закладзеную Уладыкам Сцяфанам, –
адзначыў яго пераемнік па архіпастырскім служэнні Уладыка Георгій. – На маю думку, “Каляды ў Доме Коласа” – гэта
своесаблівае духоўнае адраджэнне беларускага народа.
Для
гасцей з Палесся экскурсію правяла праўнучка Якуба Коласа Васіліна Міцкевіч. Яна
разам з унучкай народнага песняра Верай Міцкевіч сталі саўтарамі кнігі “Табою
жыў. Табой жыву…” (2022), прысвечанай жонцы Якуба Коласа. Вядома, што
Канстанцін Міхайлавіч Міцкевіч і Марыя Дзмітрыеўна Каменская (якіх, услед за
Уладыкам Сцяфанам, называем “беларускімі Пятром і Фяўроніяй”) вянчаліся ў
Пінску, дзе на звонніцы Свята-Варварынскага храма ўсталявана мемарыяльная дошка
ў гонар гэтай падзеі. Пасля кароткага прадстаўлення новага выдання кніга з
аўтографамі нашчадкаў класіка была падорана архіерэю.
З
удзячнасцю духавенству Пінскай епархіі за ўвагу да Якуба Коласа Аляўціна
Цімафееўна Міцкевіч, удава старэйшага сына, прыгадала, што браты яе бабулі былі
свяшчэннікамі, таму Нараджэнне Хрыстова станавілася вялікім сямейным святам з
багатым застоллем, дамашнім канцэртам і духоўнымі размовамі.
Параўнальна
невялікае кола ўдзельнікаў урачыстасці ў музеі таксама ўвасабляе сямейную
атмасферу. Жаданым госцем музычнай каляднай праграмы неаднаразова быў кіраўнік місіянерскага аддзела
Пінскай епархіі протадыякан Андрэй Гарбуноў з Баранавіч. Вось і цяпер у музычнай
гасцёўні ён не толькі захапіў сталічных гледачоў сваімі спевамі вядомых песень,
пачынаючы са сваеасблівага нацыянальнага гімна “Мой родны кут”, але і чытаннем
урыўка “Каляды” з паэмы “Новая зямля” – сёлета адзначаецца 100-годдзе выдання. Літаратурны
напрамак сустрэчы працягнулі вядомыя пісьменнікі Іна Фралова і Сяргей
Трахімёнак, творчасць якіх вельмі любяць і цэняць на Палессі. Як святло
Хрыстова Нараджэння напаўняе душы і дамы любоўю, так і калядная праграма
праецыравала духоўнасць на ўсе сустрэчы ў Доме Коласа.
Таццяна Канапацкая. Фота з архіва
музея.
Комментарии
Отправить комментарий