Благаславенне на канікулы

Так можна назваць шэраг экскурсій у храм іконы Божай Маці “Спатоленне пагіблых” (“Взыскание погибших”).

У першы дзень восеньскага адпачынку іх зрабілі вучні Лунінецкай гімназіі. Разам з бібліятэкарам Ірынай Раманчук 9-класнікі азнаёміліся з месцамі пахаванняў ахвяр Першай і Другой сусветных войнаў, паміж якімі – па старажытнай хрысціянскай традыцыі – быў узведзены храм. Настаяцель іерэй Сергій Крышталь сустрэў дзяцей на двары, паведаміў аб планах узвядзення храмавага комплексу. Потым гімназістаў чакала наведванне новай царквы, дзе асабліва ўразілі абразы, напісаныя мясцовай іканапісцам – выкладчыкам мастацкага аддзялення ДШМ Валянцінай Трухановіч. У інфармацыйна-асветным цэнтры храма вучні паглядзелі відэафільм “Другой Хрышчэнне Русі” – аб аднаўленні праваслаўных святынь пасля юбілею 1000-годдзя гэтай лёсавызначальнай падзеі, што забяспечыла цывілізацыйны выбар усходніх славян.

Такім жа быў экскурсійны маршрут і 5-класнікаў на чале з настаўніцай Галінай Мікалаеўнай Сіманавай. У адпаведнасці з іх узростам паведамляліся самыя ўражваючыя факты з гісторыі мінулай вайны на тэрыторыі раёна, а айцец Сергій у даступнай форме пазнаёміў дзяцей з уладкаваннем храма. Для юных гімназістаў прадэманстравалі анімацыйны фільм “Хрышчэнне Русі” (абавязкі “відэаператара” выканаў 9-класнік СШ №2 г. Лунінца Кірыл Савіч, алтарнік храма). Гэты “мультык” настолькі насычаны інфармацыяй, што быў варты прагляду прадстаўнікоў элітнай навучальнай установы. Асобныя дзеці паведамілі, што наведваюць нядзельную школу. Хочацца спадзявацца, што іх прыкладу паследуюць і аднакласнікі.

Таццяна КАНАПАЦКАЯ. Фота аўтара.