І
гэта адбылося не толькі на нядзельнай
праграме народнага аматарскага аб’яднання
“Світанак”!
Вядомы
калектыў з Дзятлавіцкага ЦСДК палічыў
за гонар выступіць у інфармацыйна-асветным
цэнтры храма іконы Божай Маці “Спатоленне
пагіблых”, які самадзейныя артысты
наведалі ўпершыню. Іх прадставіла
гледачам пастаянная вядучая цэнтра
Святлана Фёдараўна Карпінская.
Знаёмячы
гледачоў з творчымі дасягненнямі
калектыву, дырэктар Дома культуры Алена
Яскевіч расказала аб удзеле ў шматлікіх
фестывалях і запісах тэлепраграм. Асобна
спынілася на ліпеньскай паездцы ў
Вільнюс. Прадстаўнікі 12 дзяржаў (ад
Беларусі – “Світанак” разам з фальклорным
ансамблем Беларускага дзяржаўнага
ўніверсітэта культуры і мастацтва)
дэманстравалі ўзоры традыцыйнай народнай
спадчыны. Штодзень надвор’е было
дажджлівым, і сталічныя жыхары жартам
тлумачылі, што і назву сваю – Літва –
краіна атрымала ад таго, што ўвесь час
ідуць ліўні… Праз тыдзень удзельнікі
фестывалю захоплена адзначалі: калі
выступае беларускі “Світанак”, з-за
хмар выглядае сонца.
–Можа,
таму, што пачыналі мы праграму адным з
самых старажытных твораў у нашым
рэпертуары, – гэта жніўныя абрадавыя
спевы з такімі словамі: “Да дай, Божа,
цёпла лета…”, – усміхалася Алена
Дзянісаўна.
У
гэтую зімовую нядзелю ў Лунінцы гучалі
іншыя – калядныя – фальклорныя і
сучасныя народныя песні. Але падчас
канцэрта сціх моцны вецер і вызірнула
сонца, праясніўшы над храмам чыстае
блакітнае неба! Быццам таксама захаплялася
багатымі галасамі і прыгожымі спевамі,
якія, разам з кіраўніком ЦСДК, дарылі
Мікалай Яскевіч, Галіна Хартановіч,
Людміла Раковіч, Яўгенія Хартановіч
пад акампанемент на баяне Аляксандра
Каховіча.
Прыемна
было бачыць, што славуты калектыў рыхтуе
годную змену. 11-класніца Дзятлавіцкай
СШ Аксана Кукса выканала некалькі
сучасных песень, прыцягнуўшы ўвагу
чыстым голасам і стрыманай манерай
сцэнічных паводзін.
Шчыры
водгук гледачоў перадаў настаяцель
храма іерэй Сергій Крышталь, падзякаваўшы
самадзейным артыстам за стварэнне
цудоўнага святочнага настрою. Як і
належыць, гаспадары аддзячылі
“калядоўшчыкаў” салодкімі пачастункамі.
Таццяна
КАНАПАЦКАЯ. Фота аўтара.
Комментарии
Отправить комментарий