25
студзеня ў інфармацыйна-асветным цэнтры
храма іконы Божай Маці “Спатоленне
пагіблых” (“Взыскание погибших”)
імянінніц чакаў цудоўны музычны
падарунак.
У
дзень святой Таццяны
сваю творчасць прыхаджанам
дарыў ансамбль “Арт-Нуэва” педагогаў
Лунінецкай дзіцячай школы мастацтваў.
Пачаўшы з вядомай “Авэ Марыя” Астара
П’яцолы, яны выканалі шэраг твораў
вялікага аргенцінскага кампазітара,
які пры жыцці стаў класікам, – “Зіма ў
Буэнас-Айрэсе”, “Віолен-танга”, “Малыш
з Бачына” і іншыя. Усеагульнае захапленне
выклікалі салісты калектыву – калега
музыкантаў Віктар Круглік і госця з
Гродна Алеся Медвядзюк. Многія прыхаджане,
даведаўшыся пра 5-гадзінную (акрамя
штотыднёвых) рэпетыцыю (3 – напярэдадні
і 2 – у дзень 50-хвіліннага канцэрта), ці
не ўпершыню задумаліся аб тым, колькі
працы трэба прыкласці музыкантам, каб
уразіць лёгкасцю прафесійнай дасканаласці.
60-гадовы мужчына не хаваў захаплення:
–Калі
па радыё перадаюць класічныя ці камерныя
творы, звычайна выключаю прыёмнік. Цяпер
сэрца замірала ад прыгажосці. І асэнсаваў,
як шмат страціў, што раней не чуў
сапраўднай музыкі, той, што называюць
– жывая…
Вядучыя
– бібліятэкар гімназіі Ірына Раманчук
і 9-класнік Аляксандр Верас, настаўніца
СШ №4 Святлана Карпінская – правялі
сапраўдны музычны “ўсенавуч” для
гледачоў. Тыя не шкадавалі апладысментаў
і, у сваю чаргу, падрыхтавалі салодкія
пачастункі для артыстаў.
Віншуючы
імянінніц з днём анёла, настаяцель іерэй
Сергій Крышталь уручыў іконкі прысутным
Таццянам. У іх ліку былі настаўніца СШ
№2 Т.П. Ларкіна і ветэран педагагічнай
працы Т.І. Раковіч, выкладчыца ДШМ Т.А.
Калешка, работнік аддзялення сувязі
Т.М. Грыгор’ева, бухгалтар ААТ
“Палессеэлектрамаш” Т.Р. Канапацкая,
прадавец магазіна “Кветкі” Т.Ф.
Грыгорьева і многія іншыя.
Асабліва
пранікнёныя словы былі адрасаваны
музыкантам. Айцец Сергій падарыў іконкі
і ружы кіраўніку ансамбля Алене Коўшык
(баян), Святлане Цяльпук (гітара), Людміле
Корчык (фортэпіяна), Анжаліцы Шановіч
(бас-гітара), Таццяне Чарнавокай (скрыпка).
Дарэчы, імянінніца спявае ў нядзельным
хоры педагогаў ДШМ, рэгент якога – яе
калега-цёзка Таццяна Круглік. Свяшчэннік
запрасіў маладых выканаўцаў далучацца
да царкоўных спеваў, нагадаўшы думку
многіх вялікіх артыстаў: Богам дадзены
дар трэба і аддаваць Госпаду…
Гледачы
выказалі шчырую ўдзячнасць ансамблю
“Арт-Нуэва” за стварэнне святочнага
душэўнага настрою, які працягнуўся ў
храме духоўнасцю акафіста.
Таццяна
КАНАПАЦКАЯ. Фота аўтара.
Комментарии
Отправить комментарий