Калядны падарунак

атрымаў храм іконы Божай Маці “Спатоленне пагіблых” (“Взыскание погибших”) у трэці дзень святкавання Нараджэнне Хрыстова.

Трымаючы ікону Божай Маці “Неўпіваемая Чаша”, дабрачынец з Мінска расказаў, што з’яўленне цудадзейнага абраза Багародзіцы адбылося ў 1878-ым у падмаскоўным Серпухаве. На жаль, быў страчаны ў гады ваяўнічага атэізму. Са спіска, які адноўлены, аналагічныя дазволена ствараць толькі двум манахам. Адзін з іх і напісаў ікону для храма ў Лунінцы. У манастыр, дзе захоўваецца ікона, ажыццяўляецца паломніцтва з усіх краін свету. Людзі, якія пакутуюць на вінапіцце, па міласці Божай часта атрымліваюць вылячэнне ад гэтай і іншых хвароб.

Настаяцель іерэй Сергій Крышталь падзякаваў за каштоўны падарунак і выказаў спадзяванне, што і лунінецкім сем’ям, дзе жыццё азмрочана злоўжываннем алкаголю, спісак з цудадзейнай іконы дапаможа пазбавіцца ад бяды.

Сімвалічна, што старажытны манастыр у Серпухаве быў заснаваны прападобным Сергіем Раданежскім, 700-годдзе якога летась урачыста, шматлікімі духоўна-асветнымі мерапрыемствамі, святкавалася і ў нашым прыходзе. Быццам Багародзіца прывяла ў наш горад і вялікага святога, які лічыцца заступнікам прагнучых адукацыі людзей, каб праз затуманеную свядомасць пітушчых прабілася святло розуму. Яшчэ больш уразіла звестка, што на шляху ў Лунінец ікона некалькі тыдняў знаходзілася на прастоле ў мінскай царкве ў гонар свяціцеля Мікалая Японскага. Як вядома, у дзень яго памяці 16 лютага быў асвячаны наш храм…

Таццяна КАНАПАЦКАЯ. Фота аўтара.