Сяргею — ад Сергія…

У гонар 65-годдзя Сяргея Трахімёнка ў Мінскім Доме літаратара, адбыўся творчы вечар, удзельнікамі якога сталі і прыхаджане нашага храма.

Сяргей Аляксандравіч – вядомы беларускі юрыст, доктар навук, прафесар, выкладчык Інстытута нацыянальнай бяспекі. Папулярнасць яму прынесла літаратурная праца. У пісьменніка, які прыняты ў творчыя саюзы і Беларусі, і Расіі, выдадзена больш як 10 кніг. Адна з іх – “Сіндром выгарання” – прызнана “Дэтэктывам года-2008” і ўзнагароджана прызам “Залаты Купідон”.

Наш горад Сяргей Трахімёнак упершыню наведаў у 2006-ым. Гасцінна прымаюць яго на Палессі многія калектывы. На ўрачыстасці ў сталіцу былі запрошаны прадстаўнікі некаторых – старшыня прафкама лакаматыўнага дэпо Лунінец Аляксандр Матор і бібліятэкар Лунінецкай гімназіі Ірына Раманчук. Перад пачаткам сустрэчы лунінчане сфатаграфаваліся разам з вядомай журналісткай Тамарай Вяцкай, якая вяла “капустнік”, і былой ліцэісткай. Выпускніца-2012 Ганна Курак, вітаючы Сяргея Трахімёнка, жартаўліва абыграла сапраўднае сяброўства пісьменніка з прэстыжнай установай адукацыі Лунінца.

–Ці ведаеце вы, што сталі маім хросным бацькам? – звярнулася дзяўчына да юбіляра.

Гледзячы на яго разгублены выгляд, удзельнікі вечарыны заўсміхаліся. А Аня расказала, што ў свой час атрымала заданне для насценнай газеты ўзяць інтэрв’ю ў Сяргея Аляксандравіча. Гэта справа ёй так спадабалася, што цяпер яна – трэццякурсніца Інстытута журналістыкі БДУ. Лічыць, што менавіта пісьменнік вызначыў яе прафесійны шлях.

Дачка нашай прыхаджанкі – медсястры аддзялення рэанімацыі цэнтральнай раённай бальніцы – Альбіна Согава нагадала яшчэ аб адной іпастасі шматграннай асобы навукоўца. Сяргей Аляксандравіч выконвае бардаўскія песні пад уласны акампанемент на гітары. Гэтым інструментам захоплена і Альбіна – выпускніца Лунінецкай дзіцячай школы мастацтваў і Беларускага дзяржаўнага педагагічнага універсітэта, якая цяпер працуе ў Мінску. Яна падзякавала юбіляру за павагу да яе незабыўнай настаўніцы Наталлі Іванаўны Мурко, у творчых вечарынах памяці якой заўсёды прымае ўдзел пісьменнік.

У час прыездаў у Лунінец Сяргей Аляксандравіч абавязкова наведвае наш храм, сустракаецца з настаяцелем іерэем Сергіем Крышталём. Ад імя бацюшкі юбіляру быў уручаны падарунак – ручка з надпісам “700 год Сергію Раданежскаму”, якую летась дарылі імяніннікам у гонар цудатворцы. Пісьменніка і свяшчэнніка аб’ядноўвае перакананне, што “толькі тыя літаратурныя творы становяцца вялікімі, якіх ахінае евангельскае святло”.

Таццяна КАНАПАЦКАЯ. Фота аўтара.