Падарунак ад Уладыкі

Рэдкае выданне – “Тлумачальны педагагічны слоўнік. Духоўныя і маральныя паняцці” – папоўніла бібліятэку Лунінецкай гімназіі.

Кнігу ўручылі ўдзельнікам рэспубліканскага семінара “Гісторыя Праваслаўя роднага краю: вопыт і методыка вывучэння”, які адбыўся ў храме іконы Божай Маці “Усіх тужлівых радасць” Мінска. У ліку дакладчыкаў была бібліятэкар гімназіі Ірына Раманчук, якая расказала:

–Кіраваў сустрэчай наш шаноўны зямляк – епіскап Барысаўскі і Мар’інагорскі Веніямін. Уладыка заклікаў да больш шырокага супрацоўніцтва царкоўных і свецкіх устаноў у такім важным для выхавання патрыётаў роднай зямлі напрамку дзейнасці. Надзвычай карысны атрымалі і падарунак. Амаль 900-старонкавы слоўнік папоўніў кніжны фонд нашай установы адукацыі, а другі экземпляр я перадала ў бібліятэку храма іконы Божай Маці “Спатоленне пагіблых” (“Взыскание погибших”).

Ірына Пятроўна пазнаёміла ўдзельнікаў семінара з гісторыяй святыні Палесся – Дзятлавіцкага Нова-Пячэрскага праваслаўнага манастыра, 390-годдзе якога адзначылі летась. Цікавымі былі выступленні іншых прадстаўнікоў Пінскай епархіі. Выкладчык нядзельнай школы Крыжа-Узвіжанскага храма в. Святая Воля Івацэвіцкага раёна Л.А. Стахавец даследавала духоўную сувязь Жыровіцкага Успенскага манастыра і Глінскай Ражджаство-Багародзіцкай пустыні, паведаміла аб славутых верніках. Галоўны бібліёграф духоўна-асветнага цэнтра “Вытокі” Т.К. Баговіч стварыла праект “Дарогамі праваслаўнай Піншчыны”. Кандыдат багаслоўя, протадыякан Свята-Пакроўскага храма Андрэй Гарбуноў занатаваў гісторыю праваслаўных храмаў горада Баранавічы.

Захопленыя краязнаўствам прадстаўнікі розных мясцін былі адзіныя ў думцы, што неабходна весці летапіс важных падзей, даследаваць старажытныя праваслаўныя храмы і помнікі мясцовай культурнай спадчыны, збіраць матэрыялы ў стварэнне кнігі “Праваслаўная Памяць”.

Таццяна КАНАПАЦКАЯ. Фота Ірыны РАМАНЧУК.