Добрыя весткі

імкнецца паведамляць людзям лунінчанка Ганна Аляшкевіч, адданая прыхаджанка храма іконы Божай Маці “Спатоленне пагіблых” (“Взыскание погибших”).

Хто можа сказаць, што пазбаўлены бядот?! Вось і Ганна Аляксандраўна шмат год даглядала мужа, хваробай прыкаванага да ложка. Летась яго зямное пакутніцтва завяршылася. Але за сталых дзяцей маці хвалюецца, як за малых. Сыну зрабілі аперацыю ў абласной бальніцы – тут жа ўзяла білет на цягнік на Брэст, каб падтрымаць родную крывінку. Знаёмая жанчына марыла аб наведванні Пачаеўскай лаўры, але баялася ехаць у “бліжняе замежжа” адна. Ганна Аляксандраўна не адмовіла ў просьбе суправадзіць у паломніцтва – сама часта пакланялася святыні. Дзяжурствы ў храме лічыць маральным абавязкам і не прымае пахвалы за адданасць прыходу: маўляў, нічога асаблівага – жыву побач. Актывіст грамадскіх сходаў шчыра разважае пра духоўнасць з гасцям сустрэч. На мае ж пытанні пра яе жыццё-быццё адказала, што лепш раскажа пра адну з амаль 200 ікон, што размешчаны ў інфармацыйна-асветным цэнтры:

–Гэты абраз Дабравешчання Прасвятой Багародзіцы напісаў мой брат. Мне вельмі хацелася зрабіць ахвяраванне царкве, якая будавалася. Тады яшчэ не запомніла дакладна назву храма, вось ён і зрабіў на свой выбар…

Так я даведалася, што брат лунінчанкі – вядомы мастак Анатоль Концуб. Іх малая радзіма – Давыд-Гарадок. Цяжкім было пасляваеннае дзяцінства, але кожны з сям’і знайшоў свой лёс у іншых мясцінах. Анатоль Аляксандравіч жыве і працуе ў Бабруйску. Ён актыўна ўдзельнічае ў рэспубліканскіх і замежных выставачных праектах і конкурсах, яго творчасць адзначана шэрагам медалёў рознай вартасці. Імя палешука вядома ў гарадах Расіі, Балгарыі, Польшчы, Аўстрыі, ЗША і іншых краінах, дзе былі прадстаўлены вырабы з керамікі, а таксама творы жывапісу. Вось і цяпер персанальная выстава А.А. Концуба дэманструецца ў сталічнай галерэі “Мастацтва”, а назва яе – “Падарожжа з анёлам”. У шматлікіх рэцэнзіях адзначаецца, што вера ў Бога дапамагае мастаку захаваць натхненне і жаданне быць запатрабаваным у творчай прасторы.

Цяпер больш пільна ўглядаюся ў ікону, якую стварыў “майстар дэталізацыі”, – так называюць Анатоля Концуба. Сапраўды, “кожную непрыкметную травінку аўтар разглядае як мастацкі аб’ект і падкрэслівае яе колерам і вытанчанасцю ліній”… Удзячна мастаку, што таленавіта славіць Багародзіцу пэндзлем, і Ганне Аляксандраўне – за чарговую цікавую добрую вестку.

Таццяна КАНАПАЦКАЯ. Фота аўтара.