Праект “Дзень Анёла” ў інфармацыйна-асветным цэнтры храма іконы Божай Маці “Спатоленне пагіблых” (“Взыскание погибших”) прысвяцілі Настаўніку з вялікай літары.
Емяльян Емяльянавіч Кірыковіч (1917-2001) выкладаў матэматыку і нямецкую мову ў СШ №2 і СШ №3, шэрагу школ раёна. Паважанаму педагогу сёлета было б 100 год… На сустрэчы памяці прысутныя падзяліліся ўспамінамі аб чалавеку, важным у жыцці многіх. Ветэраны педагагічнай працы Наталля Іванаўна Казанкова і Валянціна Васільеўна Валько прыгадалі, як успрымалі Емяльяна Емяльянавіча, будучы спачатку яго вучаніцамі, а пасля – калегамі. Адзначаючы высокі прафесіяналізм выкладчыка, усё ж больш спыняліся на асабістых якасцях, якіх сёння так не хапае сучаснаму грамадству. Знешне – галантнасць і ветлівасць у адносінах да людзей, не залежна ад іх сацыяльнага статусу і ўзросту. Унутрана – чалавечая годнасць і глыбокая вера, якую захаваў нават у час жорсткага атэізму… 
У царкоўным календары сем раз адзначаецца дзень святога, у гонар якога названы Е.Е. Кірыковіч, у тым ліку ў ліпені – месяцы яго нараджэння. Праглядзелі відэафільм пра мучаніка Еміліяна Дарастольскага, які аддаў жыццё за Іісуса Хрыста. У выкананні ветэрана працы медустаноў Ірыны Арсеньеўны Прыгодзіч прагучала песня “Веры тонкая свеча на ветру горит”, пранікнёныя словы якой быццам занатавалі лёс легенды лунінецкай адукацыі...
Таццяна КАНАПАЦКАЯ. Фота аўтара.
Комментарии
Отправить комментарий