Тры дні без гаджэтаў

ІV злёт праваслаўнай моладзі “Маран Афа” (“Прыйдзі, Гасподзь”) пачаўся з пакланення часцінцы мошчаў блажэннай Матроны Маскоўскай.
У храме в. Багданаўка адбыўся малебен. Настаяцелю протаіерэю Мікалаю Вабішчэвічу саслужылі протаіерэй Валерый Скрабец (Лахва), протаіерэй Сергій Чыж (Язвінкі), іерэй Аляксандр Вабішчэвіч (Мокрава). З пажаданнямі плённага і спрыяльнага адпачынку юным паломнікам уручаны духмяныя караваі.

Урачыстае адкрыццё традыцыйнай сустрэчы адбылося на ўзбярэжжы возера Белае. Злёт арганізаваны ў рамках пагаднення паміж раённым аддзелам па адукацыі і Лунінецкай благачыннай царкоўнай акругай, а праводзяць яго педагогі і духавенства, проста неабыякавыя людзі. Сапраўднымі сябрамі сталі прадстаўнікі гарадской арганізацыйнай структуры ДТСААФ і раённай арганізацыі Беларускага саюза афіцэраў. Сёлета актыўны ўдзел у праграме прынялі райкам Беларускага Чырвонага Крыжа і пярвічная арганізацыя Беларускага саюза ветэранаў органаў пагранічнай службы (асаблівая ўдзячнасць – працаўніку лакаматыўнага дэпо Віталю Іванавічу Дранічу). З дапамогай іерэя Алексія Ільючыка (Красная Воля) да ўдзельнікаў злёту далучыліся спецыяліст і наведвальнікі аддзялення дзённага знаходжання інвалідаў з тэррытарыяльнага цэнтра сацыяльнага абслугоўвання насельніцтва. Шэраг вышэй названных свяшчэннікаў суправаджалі каманды юных прыхаджан. Духоўную падтрымку аказвалі таксама протаіерэй Іаан Пятрэнка (Бастынь), протаіерэй Сергій Крышталь (Лунінец), іерэй Аляксандр Барысаў (Рэдзігерава), іерэй Васілій Мартынаў (Вічын). Сярод дабрачынцаў злёту – і раённае аддзяленне Беларускага Фонду міру, ад імя якога дзяцей і дарослых вітаў яго кіраўнік, старшыня райсавета Віктар Анатольевіч Рафаловіч.

Разнастайная праграма змясціла гутаркі на патрыятычна-духоўныя тэмы, знаёмства з кінолагам і афіцэрамі Пінскага пагранічнага атрада, супрацоўнікамі раённых аддзелаў па надзычайных сітуацыях і ўнутраных спраў, спаборніцтвы па турызму і ваенна-прыкладных відах спорту, грэблі на байдарках, віктарыны літаратурную (яе правялі работнікі Лунінскай сельскай бібліятэкі) і праваслаўную, краязнаўчую квэст-гульню, экалагічную акцыю і шмат іншых сумесных спраў.

З задавальненнем змагалася на роўных цудоўная сямёрка. Шмат узнагарод атрымалі каманды прыходаў Крыжаўзвіжанскага і храма іконы Божай Маці “Спатоленне пагіблых” (“Взыскание погибших”), ГАС ДТСААФ – усе з Лунінца, а таксама храма мучаніц Веры, Надзеі, Любові і маці іх Сафіі з Багданаўкі; храма Нараджэння Багародзіцы з Лахвы, Свята-Пакроўскага храма з Мокрава. Самымі згуртаванымі паказалі сябе юныя прыхаджане Спаса-Прэабражэнскага храма з Язвінак, пачынаючы з аднолькавых маечак з назвай “Віцязі” і перамогамі ў розных відах праграмы.

Малітвай дзень пачынаўся і завяршаўся. Дружна спяваліся песні каля вогнішча вечарам, а на працягу дня тут збіраліся, каб падсілкавацца смачнай і здаровай ежай.

Удасканальванне не мае межаў, аб чым вялася размова педагогаў і духавенства пры падвядзенні вынікаў. Заўвагі будуць улічаны ў наступным годзе, а пакуль папрасіла некаторых дарослых падзяліцца ўражаннямі аб “Маран Афа-2018”.

Начальнік злёту – настаўнік гімназіі Ірына Аляксандраўна Грушэўская:
–Нашу сустрэчу здымала Брэсцкае абласное тэлебачанне. Мяне спыталі: навошта вам дадатковыя клопаты ў час адпачынку? Адказала евангельскімі словамі: вера без спраў мёртвая. Злёт – гэта наша справа служэння Богу…

Здольны “кухар” – бібліятэкар гімназіі Ірына Пятроўна Раманчук:
– Хлопчыкі і дзяўчынкі ахвотна дзяжурылі па кухні. У іх быў выдатны прыклад – бацюшкі! Нашы дзеці – цудоўныя, але ім трэба падказваць, як трэба весці сябе ў адпаведных сітуацыях. І яшчэ – вельмі хацелася сямейнай атмасферы. Як было радасна, калі некаторыя бацькі наведалі сваіх сыноў-дочак і далучыліся да агульных праграм!

Медсястра ЦРБ Наталля Сцяпанаўна Сладзінская:
–Мне былі цікавыя ўсе спаборніцтвы і конкурсы. Заўсёдная радасць – мець асалоду ад знаходжання на беразе жамчужыны Лунінеччыны. А яшчэ я бязмежна шчаслівая ад таго, што мая ўнучка, якая не развітваецца са смартфонам, забылася на яго на ўсе тры дні!

Таццяна КАНАПАЦКАЯ. Фота аўтара.